- Netið heitir á ensku Internet en er kallað Netið á íslensku
Netið er tenginet fjölda tölvuneta um heim allan. Gagnvart notandanum virðist sem um eitt net sé að ræða sem er í raun samsafn margra mismunandi tölvuneta.
Veraldarvefurinn heitir á ensku world wide web sem oft er skammstafað www. Hann hvílir á Netinu og var opnaður almenningi árið 1993 en það er á honum sem vefsetur hvíla eins og við þekkjum þau í dag. Veraldarvefurinn er því mjög ungur að árum og fer sífellt stækkandi.
Veraldarvefurinn virkar þannig að þú opnar vafrann þinn, til dæmis Internet Explorer, FireFox eða Opera, og slærð inn slóð að vefsetri sem þú vilt skoða. Slóð Morgunblaðsins er til dæmis www.mbl.is. Tölvan þín sendir frá sér boð í aðrar tölvur sem senda aftur boð til þinnar tölvu og vafrinn sér um að greina þessi boð í mynd og texta sem birtist svo á tölvuskjánum. Á flestum vefsetrum eru virkar tilvísanir, á ensku links, sem vísa á önnur vefsetur eða aðrar síður sem hægt er að heimsækja með því að smella með músinni á tilvísunina.
Þú sérð örina breytast í til dæmis í hönd þegar þú ert yfir virkri tilvísun eða mynd og ef þú smellir á það ferð þú beint inn á aðra síðu. Í rauninni er ekki svo mikill munur á því að flakka um Netið og að skipta um stöðvar á sjónvarpinu þínu, þú notar bara mús í stað fjarstýringar. En þegar sjónvarpið býður ekki upp á nema um 20 til 30 stöðvar í mesta lagi býður Netið upp á margar milljónir vefsetra. Eins og sumir þættir í sjónvarpinu eru sum vefsetur ekki skemmtileg eða áhugaverð, sumar eru bara ljótar, því látum við þær bara eiga sig og förum eitthvað annað og skemmtilegra.